Gabimet qe bejme kur gatuajme i kemi te trasheguara brez pas brezi. Por sekretet e vërteta të kuzhinës nuk janë aspak ato qe na kane treguar deri me sot… Zbuloni te vertetat dhe te genjeshtertat rreth atyre qe dini per gatimin.
Mishi është shumë i kripur? Mjafton të shtoni një patate. Doni që gjella juaj të ketë më shumë shije? Atëherë mos kurseni tek yndyrnat dhe erëzat. Këto e të tjera këshilla të tilla kalohen nga nënat te vajzat e tyre. Por shpesh këto marifete janë të kota.
Gjalpi i bën biskotat më të buta dhe të shkrifëta
E rreme Të ngrejë dorën kush nuk është e bindur që shkriftësia e biskotave varet nga sasia e gjalpit që përmbajnë. E megjithatë nuk është e vërtetë. Ideja që bollëku i një ushqimi është i lidhur me praninë e substancave të yndyrshme është shumë i përhapur. Dhe ka mundësi që në përgatitjet industriale të jetë kështu. Por nëse doni të bëni biskota të buta nuk keni nevojë për shumë gjalpë. Në të vërtetë, receta e brumit të shkrifët kërkon 200 g. Ju reduktojeni në 120 g dhe në vend të 500 g miell përdorni vetëm 350 g, të cilit do t’i shtoni 125 g miell patatesh.
Alkooli i verës ose i likerit duke u gatuar avullon i gjithi
E rreme Alkooli avullon edhe në temperaturën e ambientit. Në të vërtetë, një sasi e vogël mbetet në ushqim. Dhe në përqindje të ndryshme, që variojnë sipas madhësisë së tenxheres së përdorur dhe nga koha që kërkohet për gatim. Nëse doni ta eliminoni sa më shumë të jetë e mundur dhe që në ushqim të mbetet vetëm aroma e likerit ose verës, mos përdorni kapakun.
Kërpudhat nuk lahen
E rreme Kërpudhat përbëhen nga 90 % ujë dhe janë shumë poroze. Por kjo nuk do të thotë që nuk mund të lagen. E rëndësishme është që të mos i lini në ujë të rrjedhshëm, përndryshe qullen dhe pasi janë gatuar e lënë lëngun në pjatë, duke e humbur aromën e tyre natyrale. Më mirë është t’i shpëlani shpejt që të hiqni dheun, i cili në kontakt me ujin, zbutet dhe është më i lehtë për t’u hequr me një furçë të vogël, duke e kruajtur me delikatesë. Përpara se t’i gatuani thajini mirë me një pecetë.
Patatet thithin kripën e tepërt
E rreme/E vertete Eshtë shpresa pas së cilës kapen të gjithë kur gabimisht u hedhin shumë kripë gatimeve të tyre. Fatkeqësisht, kjo gjë nuk funksionon gjithmone. Patatet kanë fuqi thithëse, por jo kaq të lartë sa të eliminojnë te gjithe kripën e tepërt. Sigurisht, nëse e shijoni pataten pasi e keni lënë për disa minuta në supë ose në lëngun e mishit, ajo do të ketë një shije më të fortë, por jo sepse ajo ka vepruar si një sfungjer, por sepse ka qenë e zhytur në një lëng shumë të kripur. Si t’ia bëjmë atëherë? Fatkeqësisht nuk ekzistojnë zgjidhje që garantojnë sukses. Provoni të shtoni pak uthull ose sheqer: mund të “korrigjojnë” shijen dhe t’u dhurojnë pjatave tuaja një shije origjinale.
Majaja dhe soda e bukës nuk kanë afat skadimi
E rreme Soda e bukës është e efektshme për një kohë të gjatë, por vetëm nëse mbahet larg lagështirës. Dhe kuzhina është një ambient që ka luhatje temperature, ku prodhohen shumë avuj, që mund ta prishin sodën. Për majanë në pluhur, vlen e njëjta gjë, përveç asaj natyrales (majaja e birrës), e cila është e pasur me fermente dhe që mbahet vetëm 3-4 ditë në frigorifer. Një marifet si të zgjasë për një kohë më të gjatë? Mjafton ta ngrini.
